DDUN. Aitorrena

MANKOMUNITATEKO AUTOBUSAK ETA BALUARTE

2009-01-03T15:05:00.003+01:00

Iruñerriko Mankomunitateko autobusetako arrapalak inoiz ez dira oso ongi ibili, eta dirudienez, orain ere berdintsu jarraitzen dute. Azken bolada honetan, gutxiagotan erabiltzen dut zerbitzu hau beste arrazoi batzuengatik, baina begira ezazue zer gertatu zaidan bi aldiz azken hilabete hauetan.

Urri aldean, sartu nahi nuen 15. lineako autobus batean, baina arrapala ez zen atera. Arratsalde hartan bertan, Armada etorbidean erabili nahi nuen 4. lineako beste autobus bat Atarrabiara joateko, eta 4 autobus elkarren jarraian etorri zitzaizkidan arrapala atera ez zitzaizkiena. A zer-nolako zerbitzua eta puntualtasuna! Errealitatetik kanpo nengoela ematen zuen. Javier Torrensek agian pentsatuko du gutxitu fisikoen denborak gutxiago balio duela.

Eta 08-12-13an, Pio XII.a etorbidean 4. lineako autobus batean sartu nintzen; ongi ibili zen. Harrigarria! Ateak itxi eta busa abiatu egin zen, baina arrapala kanpoan geratuta (hori ez dakit teknikoki gerta litekeen, baina hala gertatu zen, eta ez da izan lehenengo aldia ikusi dudana). Arrapalak auto bat jo eta busa matxuratuta gelditu zen. Kanpora atera ninduten. Hurrengo bi autobusei ez zitzaien atera arrapala. Azken gidariak eskatu zidan itxoiteko, enpresak taxi egokitu bat bidaliko zidala. Taxia ez zen iritsi. Hurrengo autobuseko txoferrak agindu zidan barrura sartzeko, antza denez, une horretan ezinezkoa baitzen taxi egokitua lortzea; zur eta lur gelditu nintzen. A zer eraginkortasuna! 24 taxi egokiturik Iruñerrian eta bakar bat ere etorri ez! Egun berean jakin nuen Nafarroako Gobernuak ez diela uzten kobratzen taxilariei, abiapuntutik bezeroa hartu arte. Hori dela-eta, gidariak oso haserre omen daude eta urrutiko zerbitzuak ez omen dituzte egiten; ez nau batere harritzen!

Istorioaren bukaera: azkenean, iritsi nintzen Baluarte parera, Armada etorbidean. Eskailerak daude. Gurpil-aulkian sartzeko, igogailua erabili beharra dago. Laguntza eskatu eta pertsona batek hiru aldiz jo zuen txirrina nire ordez. Inork ez zuen erantzun. Baluarteko eraikin osoa inguratu eta azkenik, barrura! Emaitza: batzarrera iritsi nintzen behar baino 30 minutu beranduago.

Bukatu baino lehen, irakurleari gogorarazi nahi diot, orain dela hiru bat urte Mankomunitateari egin nizkiola ia-ia 200 kexa idatziz, Lehendakariari eta Montañesako arduradunari. Eta Baluarteko gerente jaunarekin ere beste bizpahiru aldiz izan nintzen, espresuki igogailuaren gaia tratatzeko. Ikusten denez, gauzak lehengo egoera bertsuan daude, edo okerrago; bikain goaz!

Gorago esan dudana, praktikan argi eta garbi dago gutxitu fisikoen denborak gutxiago balio duela Administrazioko gestore askorentzat, eta, gainera, gu elbarriok, jakina, ez gara hozten, ez haserretzen, ez bustitzen, ezta deus ere! Bizitza arrunt ederra da, noski!

Xanti Begiristain Madotz. Iruñea, 09-01-03

EUSKADI ETA EUSKAL HERRIA

2008-12-19T10:54:00.002+01:00

Ez naiz futbol zalea. Ziur aski, ikusi nuen azken partida izanen da orain dela 35 bat urte. Dena dela, seguru nago Euskal Herriak izanen balu bere berezko selekzioa, orduan jarriko nukeela arreta gehixeago.

Harrituta eta nazkatu samarturik nago entzuten azken egun hauetan, batez ere, EAJko jendeari, beraiei berdin-berdin zaiela Euskadi eta Euskal Herria hitzak. Gauza bera dela, alegia, esanahi berbera dutela. Horrela baldin bada, zergatik ez dute onartzen inolako eragozpenik gabe Euskal Herria hitza?

Argi dago Sabino Arana Goirik Euzkadi (Euskadi) hitza asmatu zuenean, bere barruan zazpi probintziak hartzen zituela, baina gaur egun hori ez dago hain garbi, edozein hiztegi eta entziklopediatan begiratzea baino ez dago.

Beste alde batetik, bitxi samarra gertatzen da ikustea Miren Azkarate andreak nola lehenesten duen Euskadi hitza Euskal Herria hitzaren aurrean. Ez al da, ba, bera euskaltzain osoa? Nahi duenak ikus dezala zein den Euskaltzaindiaren 139. araua. 1564 urtearen inguruan jadanik agertzen zaigu dokumentatuta Euskal Herria hitza, Joan Perez de Lazarraga arabarren idazkietan. Gero esaten digute Euskadi eleak tradizio oso luzea duela. Miren Azkarate bezalako euskaltzain oso batek ez ote lioke eman beharko garrantzi handiagorik berak onartutako Euskaltzaindiaren arau bati?

Dena den, eta bukatze aldera, Nafarroa Garaitik Arabara sartzerakoan, Ziordia herria atzean utzita, aspalditik ikusten da idazkun erraldoi bat jartzen duena EUSKADI/PAÍS VASCO. Horrekin zer ulertzen da? Ba, Nafarroa Garaia ez dela ez Euskadi, ez País Vasco, ez Euskal Herria, e.a. Eta idazkun hori ez du jarri ez UPNk, ez PPk, ez PSOEk, baizik eta Eusko Jaurlaritzak. Beste horrenbeste gertatzen da Nafarroa Garaia, Ipar Euskal Herria eta Euskal Autonomia Erkidegoko gainerako mugetan ere.

Horrek guztiak laguntzen al du euskal futbolari orok talde bakar batean jokatzeko Eguberrietako partida “ospetsu” horretan? Nik benetan uste dut ezetz.

EAEko EAJko jendeari, batez ere politikariei, eskatuko nieke sosegu eta patxada pixka bat hausnartzeko, hemen ikusitakoa ikusi ondoren, ea ez ote zaien iruditzen minduta eta irainduta sentitzeko zio asko ditugula, Euskal Herri “ez ofizialean” bizi garenok, batere lotsarik gabe, behin eta berriz esaten digutenean beraientzat berdin-berdinak direla Euskadi eta Euskal Herria hitzak. Niretzat ez, behintzat!

Xanti Begiristain Madotz. Iruñea, 08-12-19.

MIKEL LABOA

2008-12-04T01:33:00.002+01:00

Kaixo, Mikel. Iruñeko Gaiarre antzokian, lehen kontzertua eman zenuen urtean jaio nintzen. Geroago hasi nintzen ezagutzen zure abestiak. Gehienak oso-oso gustukoak ditut, eta Lekeitioak ez baldin bazaizkit gertatzen horren atseginak ere, aitortzen dut zure ausardi handia tankera horretako esperimentazioak egiteagatik.

Bizitzan zehar zorte ona izan dut, zure kontzertuetan zenbait aldiz egon ahal izateko. Hala eta guztiz ere, behin ere ez dut aukerarik izan zurekin hitz egiteko, harik eta orain dela bi urteko udan, Ondarretako hondartzan niregandik hurbil samar izan zinen arte. Aitzitik, egun hartan ere ustel atera zitzaidan, ni motza eta lotsatia izateagatik. Alegia, beste hiru pertsonarekin joana nintzen hondartza barruraino gurpil-aulkian, zurezko pasabide haietako bukaeraraino. Momentu jakin batean hirurak joan ziren bainatzera edo hondarrean barna paseatzera. Ni bakarrik gelditu nintzen liburu baten konpainian.

Halako batean, ikusi zintudan etortzen eta hurbiltzen. Niregandik 15 bat metrotara gelditu zinen. Arropa aldatu eta bainu bat hartzera joan zinen. Handik minutu batzuetara itzuli, lehortu, kaleko arropak berriz jantzi eta berriro kanporantz joan zinen. Ni denbora guztian erne egon nintzen ea momenturen batean begiratzen ote zenuen niregana, keinuren bat egiteko, baina gure begiradak ez ziren gurutzatu. Esan bezala, jende artean ez nintzen ausartu zuri deitzera ozenki. Bestalde, ni bakarrik ezin nintzen mugitu hondarraren gainean zuregana joateko, eta nire moztasunean ere ez zitzaidan bururatu laguntza eskatzea norbaiti, diskrezioz zuri deitzeko, bi hitz egiteko. Kontua da poliki-poliki, etorri bezala ikusi zintudala joaten eta niregandik urruntzen.

Huraxe izan zen ukan dudan aukera bakarra zurekin mintzatzeko, baina modu tentel hartan galdu nuen nire erruagatik. Harrezkero arantzatxo hura gelditu zitzaidan sartua. Ateratzeko, Mikel, hemendik aurrera beste hautabiderik ez dut, zure abesti ederrak entzun eta kantatzea baizik.

Mila esker, Mikel, Euskal Herriari egin diozun ekarpen bikainarengatik. Beti arte, Lili eder hori!

Xanti Begiristain Madotz. Iruñea, 08-12-03.

EUSKARA OFIZIALA

2008-11-18T15:19:00.000+01:00

Euskaraz bizitzeko eskubidearen alde!!!
Azaroak 22an MANIFESTAZIOA Iruñean, arratsaldeko 5etan, Golemetatik

IKUSI BIDEOA:

KRISTOBAL ULAZIA EUSKALDUNA.

2008-11-07T16:07:00.000+01:00

Kristobal, gaur, 08-11-03an, zu maite zintuen beste jende askorekin batera, izan naiz Ermitagañako elizan zure hileta-elizkizunean. Zure seniderik maiteenak eta Larraun, Lekunberri eta Iruñerriko lagun ugari izan gara.

Maite emaztea eta bi seme-alabak euskaldunak dituzu. Zurekin eta beraiekin beti mintzatu izan naiz euskaraz. Gaurko elizkizunean Aita gurea, Agur Jesusen ama, Txoria txori (Hegoak ebaki…) eta beste kanta bat abestu dizkizugu euskaraz; beste batzuk erdaraz izan dira. Txistulari batek Agur jaunak ere goxoki jo dizu. Beraz, horiek guztiak oso ongi egon dira; bikain. Baina, gauza batek gogotik tristatu nau, Kristobal, apezek meza osoan ez baitute esaldi bakar bat ere esan euskaraz, zure ohorez, zurekiko enpatiaz.

Niretzat pena handia izan da, zuk eman duzun erakusbidea eman ondoren. Gogoratzen dut, oso aspaldian, jadanik gaixotasunak ia-ia erabat galarazten zizunean hitz egitea, hala ere, saiatzen zinen euskaraz mintzatzen. Badakit apez horiek ez zutela asmo txarrez eginen, baina, hala eta guztiz ere, askotan harrituta gelditzen naiz apez batzuekin, ikustean zeinen gutxi praktikatzen duten predikatzen duten hura, alegia, lagundu behar zaiola behartsuenari, eta hizkuntza gaietan ez dago zalantzarik txikiena ere, Euskal Herri osoko eta bertako hizkuntzarik behartsuena euskara dela.

Eskerrik asko, Kristobal, eman diguzun adibide onarengatik eta utzi dizkiguzun emazte eta seme-alaba bikainengatik. Nahiago nuke, zuk Albiasuko muinoetatik guri laguntzen jarraituko bazenu. Beti arte, Kristobal.

Xanti Begiristain Madotz. Iruñea, 08-11-03.

EUSKARA OFIZIALA ORAIN!!!!!!!!!!!!!!!!!!!!!

2008-11-07T15:57:00.003+01:00

IRAKURRI ETA ZABALDU!! Egin click PDF

AHT . KONZENTRAZIOA

2008-11-04T12:55:00.001+01:00

ddun. Gogoratu ,hurrengo ostiralean AZAROAK 7 arratsaldeko 7etan Ekonomi eta HaziendaMinisterioaren aurrean elkartuko gara. AHTk 9.000 milioi euro baliodu...beraiek ordain dezatela!! Denon artean abiadura haundiko trena gelditzera goaz!!

ELKARTASUNA-ETORKIZUNA 2008 ZUBEROAN

2008-10-24T18:26:00.002+02:00

Hitz biribilak eta politak dira, baina baita beharrezkoak ere Herri zahar honen etorkizunean pentsatzen dugunontzat.

Bidasoan, Luzaiden edo Pirinioan ezarri diguten muga apurtzen saiatu behar dugu. Baina badakigu muga horiek ez direla fisikoak bakarrik, jendeon buruan ere hor diraute beti bezain sendo.

Usurbilen abiatu ginen orain dela sei urte taldetxo bat helburu bonekin: Euskal Herriko zazpi lurraldeetako kultur talde bana ekarri nahi genuen lehen Elkartasuna-Etorkizuna jai egunera Euskal Herriaren eta bere hizkuntzaren batasuna aldarrikatzeko eta haruntza bildutako jendeek egun eder eta alai bat pasatzeko, bazkari on eta guzti, horren festa egiteaz gain harremanak estutzeko balio duelakoan. Orduan batu ginen taldeak ginen Tuterako Beterri elkartea.

Urdiñarbeko Bilxoküa, Arabako Añana Euskara Mingainean, Basauriko Sustraiak, Baigorriko Basaizea eta Usurbilgo Nafartarrak elkartea. Geroztik elkartu zaigu Orreaga elkartea eta Hazparneko Kaxkarrotak.

Ondorengo urtetarako planteatu genuen Elkartasuna-Etorkizuna hau zazpi lurralde horietako batean ospatzea urtero, txandaka. Hasieratik oso garbi geneukan Euskal Herriko edozein bazterretako herritarrentzako eskaini nahi dugun jai bat izan behar duela, jai egun ireki eta zabala. Bagenekien ez zela erraza izango baina Nafarroako Hego muturretik hasi, eta Araba, Bizkaia, Lapurdi eta Baxenafarroan barrena Zuberoaraino iritsi gara gure mezuarekin.

2008an urriaren 25ean elkartuko gara Zuberoako Maulen eta Urdiñarben Elkartasuna-Etorkizunaren zazpigarren edizioan. Eguna hasteko kale-jira egingo dugu Zuberoako hiriburuko karriketatik. Gero Urdiñarbera joanik, han bazkalduko dugu eta ekitaldia ere bertan izanen da.
Espainiera eta Frantsesa nagusi diren herri eta jende ezberdinen egoeretatik abiatuta, Euskal Herriaren osotasunean eta euskararen bizi nahian sinesten dugun hainbat jendek elkargune gozoa aurkitu dugu festa honetan. Gure festa honetan orain arte euskara izan da hizkuntza nagusi eta ia bakarra, eta Maulen ere hala izango dela seguru gaude.

Gerta daiteke etorkizunean festa hau antolatuko den herri edo hiriren batean gaztelera edo frantsesak leku handiagoa behar izatea, baina orduan ere euskarak izan beharko du nagusitasun osoa.

Festa egiteko eguna antolatzen dugu Elkartasuna-Etorkizuna egunarekin, baina badakigu gure helburua ez dugula beteko jai horren mugetan ahitzen baldin bada parte hartzen dugun jende eta taldeen elkarlana. Hau gauzatzea urtean zehar denok egin beharreko lana izango da.
Elkartasuna-Etorkizuna. Iruñean. 2008-10-16.

ORREAGA FUNDAZIOA

ON PEDRO ON EGIN

2008-07-02T08:00:00.004+02:00

Pedro Pegenauteren garaia, garai latza izan zen Nafarroako euskaldunontzat. Euskarabidearen sortzea itxaropenez ikusi zuten euskaltzale asko eta asko, baina sortu zenetik urtea amaitu ez dela, institutu berriarena euskararen galbidea dirudi. Mikel Aranburuk berak azaldu digu zer dela eta dimititu behar izan duen. Aurrekoan esan genuen legez, aurrekontua izoztu eta murriztu da, eta etorkizunari begira, panorama ez da batere argia. Datozen hilabeteetan ikusi dugu norabidea zuzentzen duten edota okerbidean jarraitu, izan ere, jokoan dagoena ez da ahuntzaren gauerdiko eztula. Komunikabideen diru-laguntzak, inkesta soziolinguistikoa, administrazioko langileen euskalduntzea, martxa honetan ON PEDRO ON EGINEN DUTE.

EUSKARABIDEA. JOSTAILU GARESTIA

2008-06-28T09:00:00.004+02:00

Garestia ateratzen ari zaigu euskaldunoi Euskarabidearena. Murrizketaren ondoren, murrizketa. Gainera Mikel Aranbururen dimisioa eskatu du Xabier Azanzak.

Euskarabidea sosik eta jenderik gabe gelditzen ari omen da; gastu murrizketak bete betean harrapatuko du Euskarabidea; Ze Berri aldizkaria arriskuan dago; Komunikabideendako dirulaguntzak... programa gehienak. Hezkuntzan %3ko gastu murrizketa izanen da eta Euskarabidean gutxienez % 25ekoa.

Iruñea Kantuz

2008-06-21T11:07:00.005+02:00

Sanferminen aurreko azken Iruñea kantuz uztailaren 5ean ospatuko dute. Betiko orduan eta betiko tokitik abiatuko da. Ongi pasa. Argibide gehiago nahi izanez gero karrikirri elkartean atendituko zaituzte. Bezperaren bezperan elkartuko garelakoan

Euskara eta Gazteak, harreman gazi-gozoa

2008-06-18T23:31:00.004+02:00

Horixe adierazten baitute datuok, Gazteek duela hamabost urte baino gutxiago hitz egiten dute euskara. Ezagutu bai, baina erabili, oso gutxi erabiltzen dute, eta maiz inorengandik ezberdintze aldera. Gogoan ditut, begirale lanetan ibili nintzeneko garaiak, tematzen ginen gazteekin euskaraz egin zezaten, eta hara non konponbidea Madrildik ailegatu zitzaigun. ziren aterpetxera iritsi zirenak, eta horiek ailegatu bezain pronto euskaraz hasi zitzaizkigun gazteak. Bai instrumentala da euskararen erabilera.
El buclek, erran nahi baita el bulek egin du bere lana.

Larreko Saria. Xanti Begiristain

2008-06-13T12:56:00.002+02:00

ESKERRIK ASKO DENEI

Ekainaren bostean Larreko saria jaso nuen Zaldi Zuria ostatuan. Oso egun handi eta gogoangarria izan zen niretzat. Bertan egon zirenei jakinarazi nahi diet, han etxean bezala sentitu nintzela: estimatua, onartua, babestua, arropatua, baloratua, maitatua, ongi, eta ez dakit zenbat gauza gehiago. Nire pertsonarentzat benetako ohorea, pribilegioa eta ondra izan zen. Bizitzen jarraitzeko gogoa pizten duen egun horietako bat gertatu zitzaidan. Pozik, gustura, alai eta zoriontsu egon nintzen.

Jende asko bertaratu zen ekitaldira. Beste lagun askok deitu zidaten esateko atsegin handiz joanen zirela, baina dena delako konpromisoarengatik ez zutela joaterik eta gogotik sentitzen zutela. Ekitaldia bukatutakoan, hau da, azken egun hauetan ere, oraindik jasotzen ari naiz pertsona batzuen deiak, zorionak emateko.

Hartu nituen opari guztiak, merezimendu handirik gabe nire aldetik, egia esanda, aitortu beharra daukat oso kutunak izan zirela; atseginak, gogoangarriak, bihotz ondokoak… eta hortxe gordeko ditut beti, bihotzean, alegia.

Penatxo bat izan nuen, hots, denekin denbora luzeagoan ezin egona, normala den bezala, baina lasai, bizi baldin bagara, aurrerago ere izanen dugu-eta aukera luzaroago eta lasaiago elkarrekin egoteko.

Hemen ez dut izenik jarriko, denak ez direlako sartzen, baina bihotz-bihotzez eskerrak eman nahi dizkiet denei: antolatzaileei, aukeratu nindutenei, bertan parte hartu zutenei, bertaratzerik izan ez zutenei, telefonoz deitu didaten guztiei, lagundu didatenei eta ahaztu ahal izan dudan orori. Mila esker!

Zaldi Zuria ostatuan esan nuen bezala, zorretan gelditu naiz guztiekin. Eskerrik asko eta beti arte!

Xanti Begiristain Madotz. Iruñea, 08-06-10.

LARREKO SARIA 08

2008-06-06T14:53:00.002+02:00

EGIN CLICK IRUDIAN

Giro aparta Larreko sariaren banaketa ekitaldian. Xanti Begiristain beti bezain zirtolari. Mikel Bujandak ez zuen aukerarik galde eta udazkenean mustu beharreko dantza iragarri zigun, Lizentzia Dantza agindu zigun aurtengo udazkenerako. Xabier Azanza aurrez-aurre zeukan, azantza aditzeko modukoa izan zen. Euskalerria Irratiko langile, kolaboratzaile, bazkide eta hurbildu zen oro, hamaikagarrenez frogatu zuen Iruñeak ezin duela negua gainetik kendu.
Irudian klik egin eta irudi apartak ikusiko dituzue.

Erdarazko herri hau

2008-06-03T19:46:00.001+02:00

Liburuak leituz ilustratzen gara, baina zer nolako liburuak? Azken bolada honetan hainbat liburu argitara eman dira, ez dira gutxi euskaraz argitara eman direnak. Horietako batzuk, apartak, nafar herri - hiritarrek apailatuak. Baina nonbait, garrantzia handiagoa du euskal idazlea erdaraz argitaratzen duenean. Erdarazko herri hau.

Yusuf Ben Garay

Ongi pasa

2008-05-31T21:05:00.001+02:00

Ongi pasa gaur alde zaharraren egunean

Euskaraz

2008-05-31T18:59:00.000+02:00

Orain ere ddun euskaraz